खाकीचा धाक संपला? सांगली जिल्ह्यात गुन्हेगारांचे तांडव; पोलीस प्रशासनाच्या कार्यक्षमतेवर प्रश्नचिन्ह!
सांगली: जिल्ह्यात सध्या रक्ताचे पाट वाहत असून खून, गोळीबार आणि दिवसाढवळ्या होणाऱ्या लूटमारीच्या घटनांनी सांगलीकर हादरले आहेत. सलग घडणाऱ्या या गुन्ह्यांमुळे पोलीस प्रशासनाचा गुन्हेगारांवर वचक उरला आहे की नाही? असा संतप्त सवाल आता सामान्य नागरिक विचारत आहेत. कायद्याची सुव्यवस्था राखण्यात अपयशी ठरलेल्या पोलीस यंत्रणेच्या विरोधात संतापाची लाट उसळली आहे.
पोलीस सुस्त, गुन्हेगार मस्त!
गेल्या काही आठवड्यांपासून जिल्ह्याच्या कानाकोपऱ्यात टोळीयुद्ध आणि शस्त्रांचा उघड वापर वाढला आहे. ग्रामीण भागासह शहरातही गुन्हेगार मोकाट फिरत असताना, पोलीस यंत्रणा मात्र केवळ 'गुन्हे दाखल करणे' आणि 'तपास सुरू आहे' या औपचारिकतेत अडकल्याचे चित्र आहे. पोलिसांच्या या थंडावलेल्या भूमिकेमुळेच गुन्हेगारांचे मनोबल वाढले असून, त्यांना कायद्याचा कोणताही धाक उरलेला नसल्याचे स्पष्ट होत आहे.
प्रशासकीय उदासीनता की नियोजनाचा अभाव?
एकीकडे तांत्रिक तपासाचे दावे केले जात असताना, दुसरीकडे प्रत्यक्षात गुन्हेगारी रोखण्यासाठी ठोस प्रतिबंधात्मक पावले उचलली जात नसल्याचा आरोप होत आहे. पोलिसांच्या गुप्तचर विभागाचे अपयश आणि गस्त घालण्यातील हलगर्जीपणा यामुळेच टोळ्यांना रान मोकळे झाले आहे. "पोलीस प्रशासन केवळ बघ्याची भूमिका घेणार की गुन्हेगारांच्या मुसक्या आवळणार?" असा प्रश्न आता प्रत्येक चौकात विचारला जात आहे.
आता तरी 'अँटी गुंडा स्कॉड' सक्रिय होणार का?
परिस्थिती हाताबाहेर जाण्यापूर्वी पोलीस अधीक्षकांनी तातडीने 'विशेष गुंडा विरोधी पथक' स्थापन करण्याची गरज आहे. सराईत गुन्हेगारांची झाडाझडती घेणे, अवैध शस्त्रांचा पुरवठा रोखणे आणि संघटित गुन्हेगारीवर 'मोक्का'सारखी कठोर कारवाई करणे, हाच आता एकमेव पर्याय उरला आहे.
प्रमुख मागण्या आणि अपेक्षा:
विशेष पथकाची स्थापना: जिल्ह्यासाठी समर्पित गुंडा विरोधी पथक तात्काळ कार्यान्वित व्हावे.गस्त वाढवणे: रात्रौ आणि दिवसाची पोलीस गस्त अधिक प्रभावी करणे.सराईत गुन्हेगारांवर वॉच: पॅरोलवर बाहेर असलेल्या आणि रेकॉर्डवरील गुन्हेगारांची कडक तपासणी करणे.पोलीस प्रमुखांकडून कठोर पावले: केवळ बदली किंवा निलंबन न करता, गुन्हेगारी मुळासकट उपटण्यासाठी धोरणात्मक निर्णय घेणे.वेळ निघून जाण्यापूर्वी प्रशासनाने आपली 'खाकी'ची ताकद दाखवून दिली नाही, तर जनतेचा पोलीस दलावरील उरलासुरला विश्वासही उडून जाईल. आता गरज आहे ती केवळ आश्वासनांची नाही, तर प्रत्यक्ष मैदानावरील कठोर कारवाईची!
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
