सांगली जिल्हाधिकाऱ्यांचा अॅक्शन मोड: एलपीजी काळ्या बाजारावर 'सर्जिकल स्ट्राईक'चे आदेश
सांगली :- युद्धजन्य परिस्थितीच्या जागतिक प्रभावाच्या पार्श्वभूमीवर, जिल्ह्यातील एलपीजी पुरवठा साखळी विस्कळीत होऊ नये यासाठी जिल्हा प्रशासनाने कंबर कसली आहे. "एलपीजीचा अवैध साठा आणि काळा बाजार करणाऱ्यांवर कठोर गुन्हे दाखल करा," असे स्पष्ट निर्देश जिल्हाधिकारी डॉ. मैनाक घोष यांनी दिले आहेत. जिल्हाधिकारी कार्यालयात आयोजित 'एलपीजी वितरण समन्वय समितीच्या' विशेष बैठकीत ते बोलत होते. यावेळी पोलीस अधीक्षक तुषार दोशी यांच्यासह वरिष्ठ अधिकारी उपस्थित होते.
जिल्हाधिकाऱ्यांनी दिलेले महत्त्वाचे निर्देश:
भरारी पथकांची स्थापना: गॅसचा अवैध वापर आणि साठवणूक रोखण्यासाठी विशेष पथके नेमून नियमित छापे टाकण्याच्या सूचना देण्यात आल्या आहेत.अत्यावश्यक सेवांना प्राधान्य: रुग्णालये, शासकीय वसतिगृहे, अंगणवाड्या, शाळा आणि आश्रमशाळांना 'अत्यावश्यक सेवा' म्हणून प्राधान्याने गॅस पुरवठा करावा.डिजिटल ट्रॅकिंग: सर्व गॅस वितरकांनी त्यांच्या दैनंदिन वितरणाची माहिती 'गुगल शीट'वर अद्ययावत करणे बंधनकारक करण्यात आले आहे.वाहतूक तपासणी: गॅस ट्रान्सपोर्ट करणाऱ्या वाहनांची वेळोवेळी तपासणी करून त्यात कोणतीही अवैध कृती होणार नाही याची दक्षता घेण्याचे आदेश दिले आहेत.
प्रशासनाचा इशारा
घरगुती गॅस सिलिंडरचा व्यावसायिक वापर करणे किंवा त्याची अवैध विक्री करणे हा गंभीर गुन्हा असून, अशा प्रकरणांत दोषी आढळणाऱ्यांवर पोलीस आणि पुरवठा विभागामार्फत संयुक्तपणे कठोर कारवाई केली जाईल, असा इशारा जिल्हाधिकाऱ्यांनी दिला आहे.
"देशहितार्थ सर्वांनी सहकार्य करावे. गॅस वितरकांनी केंद्र शासनाच्या मार्गदर्शक सूचनांचे काटेकोर पालन करून वितरण व्यवस्था पारदर्शक ठेवावी."
— डॉ. मैनाक घोष, जिल्हाधिकारी, सांगली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
