सांगली-सातारा विधान परिषद: भाजपमधून सम्राट महाडिक यांच्या नावावर शिक्कामोर्तब होण्याचे संकेत; सातार्यातील मतभेदांमुळे सांगलीला लॉटरी?
सांगली-सातारा स्थानिक स्वराज्य संस्था विधान परिषद निवडणुकीचे बिगुल वाजताच दोन्ही प्रमुख आघाड्यांमध्ये उमेदवारीवरून मोठ्या राजकीय घडामोडी सुरू झाल्या आहेत. भाजप आणि महायुतीकडून सांगलीचे जिल्हाध्यक्ष सम्राट महाडिक यांच्या नावावर शिक्कामोर्तब होण्याचे स्पष्ट संकेत मिळत आहेत. दुसरीकडे, महाविकास आघाडीमध्ये (मविआ) इच्छुकांची मोठी भाऊगर्दी पाहायला मिळत असून अनेक दिग्गज नेते अर्ज भरण्याच्या तयारीत आहेत.
सातार्यातील मतभेदांचा सांगलीला फायदा?
भाजपच्या गोटातून मिळालेल्या अत्यंत विश्वासार्ह माहितीनुसार, या जागेवर हक्क सांगण्यासाठी सातारा भाजपमधील स्थानिक नेत्यांमध्ये जोरदार रस्सीखेच सुरू होती. मात्र, सातारा भाजपच्या प्रमुख नेत्यांमध्ये उमेदवारीबाबत एकमत होऊ शकलेले नाही. सातार्यातील याच अंतर्गत मतभेदांचा थेट फायदा सांगली जिल्ह्याला मिळण्याची दाट शक्यता निर्माण झाली आहे. परिणामी, भाजप वरिष्ठ पातळीवरून सांगली भाजपचे जिल्हाध्यक्ष सम्राट महाडिक यांच्या नावावर शिक्कामोर्तब होण्याची शक्यता वर्तवली जात आहे. महाडिक यांच्या नावामुळे पक्षातील सर्व गट एकत्र येतील आणि निवडणुकीत ताकद मिळेल, असा विश्वास वरिष्ठ नेतृत्वाला आहे.
महाविकास आघाडीत उमेदवारीसाठी चुरस; अनेक दिग्गजांची नावे चर्चेत
विरोधी पक्षांच्या महाविकास आघाडीमध्ये मात्र उमेदवारीवरून अद्याप संभ्रम आणि चुरस कायम आहे. सातारा आणि सांगली या दोन्ही जिल्ह्यांतून मविआकडे तगडे उमेदवार असल्याने कोणाला संधी मिळणार, याकडे सर्वांचे लक्ष लागले आहे.कराडमधून बाळासाहेब पाटील: कराडचे ज्येष्ठ नेते आणि माजी मंत्री बाळासाहेब पाटील यांच्या नावाचा मविआकडून गांभीर्याने विचार सुरू आहे. त्यांचा सातारा आणि सांगली या दोन्ही जिल्ह्यांतील स्थानिक स्वराज्य संस्थांच्या मतदारांशी दांडगा संपर्क आहे.सांगलीतून मयूर शेठ पाटील व संजय मेंढे: सांगली जिल्ह्यातून युवा नेते मयूर शेठ पाटील आणि संजय मेंढे हे दोघेही निवडणूक लढवण्यासाठी अत्यंत इच्छुक असून, ते उमेदवारी अर्ज दाखल करण्याची शक्यता वर्तवली जात आहे.
निवडणुकीचे गणित आणि चुरस वाढणार
सांगली-सातारा स्थानिक स्वराज्य संस्था मतदारसंघात जिल्हा परिषद सदस्य, महानगरपालिका, नगरपालिका आणि नगरपंचायतींचे नगरसेवक मतदान करतात. सातारा भाजपमधील एकीचा अभाव दूर करत सम्राट महाडिक महायुतीची नौका पार लावणार का? आणि महाविकास आघाडी सांगली विरुद्ध सातारा असा प्रादेशिक समतोल कसा साधणार? यावरच या निवडणुकीचे भवितव्य अवलंबून असणार आहे. येत्या एक-दोन दिवसांत दोन्ही बाजूंकडून अधिकृत उमेदवारांची घोषणा होण्याची शक्यता आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
