रक्तरंजित गुन्हेगारीला बसणार लगाम; एसपी तुषार दोषींचा 'रुद्रावतार', वाहतूक कोंडीतूनही सुटका!
सांगली: सांगली जिल्ह्यात वाढत्या गुन्हेगारीने डोके वर काढले असतानाच, पोलीस अधीक्षक तुषार दोषी यांनी आता आक्रमक पवित्रा घेतला आहे. "शहरातील अंमली पदार्थ तस्करांची साखळी मुळासकट उखडून टाकू आणि सांगलीत पूर्णपणे भयमुक्त वातावरण निर्माण करू," असा वज्रनिर्धार त्यांनी व्यक्त केला आहे. गेल्या काही दिवसांत खून आणि खुनी हल्ल्यांसारख्या गंभीर गुन्ह्यांमध्ये झालेली वाढ पाहता, आता पोलिसांनी 'झिरो टॉलरन्स' धोरण स्वीकारले आहे.
तस्करांचे 'नेटवर्क' उद्ध्वस्त करणार!
जिल्ह्यात फोफावलेल्या अंमली पदार्थांच्या विळख्याबाबत बोलताना अधीक्षक दोषींनी स्पष्ट केले की, केवळ किरकोळ विक्रेतेच नव्हे, तर या तस्करीमागील मुख्य सूत्रधारांपर्यंत पोलीस पोहोचणार आहेत. ही साखळी तोडण्यासाठी विशेष पथके तैनात करण्यात आली असून तस्करांचे धाबे दणाणले आहेत.
डार्क स्पॉट्सवर पोलिसांचा 'वॉच'
शहरातील ज्या निर्जन ठिकाणी (डार्क स्पॉट्स) गुन्हेगारी प्रवृत्तीचे लोक एकत्र येतात किंवा जिथे महिलांच्या सुरक्षेचा प्रश्न निर्माण होतो, अशा ठिकाणांची यादी तयार करण्यात आली आहे. या भागात पोलिसांची गस्त वाढवण्यात आली असून संशयास्पद हालचाली करणाऱ्यांवर कडक कारवाईचे आदेश देण्यात आले आहेत.
गंभीर गुन्हेगारीवर 'सर्जिकल स्ट्राईक'
गेल्या काही महिन्यांत झालेल्या रक्तरंजित घटनांमुळे सांगलीकर धास्तावले आहेत. यावर भाष्य करताना एसपी दोषी म्हणाले की, "संघटित गुन्हेगारी करणाऱ्या टोळ्यांना कायद्याचा धाक दाखवला जाईल. जे गुन्हेगार कायद्याला जुमानत नाहीत, त्यांच्यावर कठोर उपाययोजना केल्या जातील."
वाहतूक कोंडीतून सांगलीकरांची सुटका
गुन्हेगारीसोबतच सांगलीतील वाहतुकीचा प्रश्नही गंभीर बनला आहे. बेशिस्त पार्किंग आणि वाहतुकीचे नियम धाब्यावर बसवणाऱ्यांमुळे नागरिकांना नाहक त्रास सहन करावा लागतोय. ही वाहतूक व्यवस्था सुरळीत करण्यासाठी आणि शहराला शिस्त लावण्यासाठी वाहतूक पोलिसांना विशेष सूचना देण्यात आल्या आहेत."माझा उद्देश स्पष्ट आहे - सामान्य नागरिक सुरक्षित राहिला पाहिजे आणि गुन्हेगारांच्या मनात पोलिसांची भीती असली पाहिजे. सांगलीला भयमुक्त करणे हीच माझी प्राथमिकता आहे."— तुषार दोषी, पोलीस अधीक्षक, सांगली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
