Big Breaking! विटा शहरात राजकीय भूकंप! जयंत पाटील आणि गोपीचंद पडळकर यांचे समर्थक भिडले; ट्रॅव्हल्स कार्यालयाची तोडफोड, घरावर दारूच्या बाटल्या फेकल्या!
विटा :- सांगली जिल्ह्यातील विटा शहरात आमदार जयंत पाटील आणि आमदार गोपीचंद पडळकर यांच्या समर्थकांमध्ये जोरदार राडा झाल्याची धक्कादायक घटना समोर आली आहे. सोशल मीडियावरील एका स्टेटसवरून सुरू झालेल्या वादाचे पर्यावसान थेट हाणामारी आणि तोडफोडीत झाल्याने विटा शहरात काही काळ प्रचंड तणावाचे वातावरण निर्माण झाले होते. या घटनेमुळे सांगली जिल्ह्यातील राजकीय वातावरण चांगलेच तापले आहे.
सोशल मीडियावरील स्टेटस ठरले कारणीभूत
मिळालेल्या माहितीनुसार, जयंत पाटील यांचे समर्थक महेश कुपाडे यांनी सोशल मीडियावर एक स्टेटस ठेवले होते. या स्टेटसबाबत गोपीचंद पडळकर यांच्या काही कार्यकर्त्यांनी कुपाडे यांना जाब विचारला. सुरुवातीला दोन्ही गटांमध्ये शाब्दिक चकमक झाली. मात्र, पाहता पाहता या वादाने उग्र रूप धारण केले आणि दोन्ही बाजूचे कार्यकर्ते आमनेसामने आले.
ट्रॅव्हल्स कार्यालयावर हल्ला आणि तोडफोड
जयंत पाटील यांचे समर्थक महेश कुपाडे आणि अमृता कुपाडे यांनी पडळकर यांच्या समर्थकांवर गंभीर आरोप केले आहेत. गोपीचंद पडळकर यांच्या कार्यकर्त्यांनी विटा शहरातील त्यांच्या ट्रॅव्हल्स बुकिंग कार्यालयावर थेट हल्ला चढवला. या हल्ल्यात कार्यालयातील काचेचे साहित्य, फर्निचर आणि इतर वस्तूंची मोठ्या प्रमाणावर नासधूस करण्यात आली. हा संपूर्ण थरार कार्यालयात बसवण्यात आलेल्या सीसीटीव्ही कॅमेऱ्यात कैद झाला आहे.
घरावर आणि गाडीवर बाटल्या फेकून नुकसान
अमृता कुपाडे यांनी दिलेल्या माहितीनुसार, तोडफोड एवढ्यावरच थांबली नाही. संतप्त कार्यकर्त्यांनी कुपाडे यांच्या घराच्या आणि गाडीच्या दिशेने दारूच्या बाटल्या फेकून मारल्या. या भ्याड हल्ल्यामुळे कुपाडे यांच्या गाडीचे आणि घराचे नुकसान झाले असून, परिसरात भीतीचे वातावरण पसरले आहे. स्थानिक नागरिकांनीही या वाढत्या गुंडशाहीवर तीव्र चिंता व्यक्त केली आहे."सोशल मीडियावरील स्टेटसचा जाब विचारत आमच्या ट्रॅव्हल्स कार्यालयावर हल्ला करण्यात आला. कार्यालयातील साहित्याची तोडफोड केली असून आमच्या घरावर आणि गाडीवरही दारूच्या बाटल्या फेकल्या गेल्या. हा सगळा प्रकार सीसीटीव्हीत कैद झाला आहे."— महेश कुपाडे (जयंत पाटील समर्थक)
सीसीटीव्हीच्या आधारे तपास सुरू
घटनेची माहिती मिळताच पोलिसांनी तातडीने घटनास्थळी धाव घेतली. कुपाडे परिवाराने या प्रकरणी पोलिसांत तक्रार दाखल केली असून कार्यालयातील सीसीटीव्ही फुटेज पोलिसांच्या स्वाधीन केले आहे. पोलिसांनी सीसीटीव्ही फुटेज ताब्यात घेतले असून, त्या आधारे तोडफोड करणाऱ्या संशयित कार्यकर्त्यांची ओळख पटवण्याचे काम सुरू आहे. या घटनेनंतर विटा शहरात कायदा व सुव्यवस्थेचा प्रश्न निर्माण झाला असून, दोन्ही नेत्यांच्या कार्यकर्त्यांमधील वाढता संघर्ष पाहता शहरात चोख पोलीस बंदोबस्त तैनात करण्यात आला आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
