सांगली मनपातील भाजपच्या ‘अंतर्गत युद्धात’ विकासाचा बळी! बजेटच्या गोंधळावरून मंगेश चव्हाणांचा कडाडून प्रहार
सांगली: "सांगली-मिरज-कुपवाड शहराच्या विकासाचा कणा असलेले महापालिकेचे बजेट सत्ताधारी भाजपच्या आपसांतील मतभेद आणि गटबाजीमुळे हवेत टांगले असून, यामुळे सांगलीचा विकास पूर्णपणे ठप्प झाला आहे. भाजपच्या अंतर्गत संघर्षाने शहराचे वाटोळे केले आहे," असा खळबळजनक आरोप विरोधी पक्षनेते मंगेश चव्हाण यांनी केला आहे.
सत्तेच्या 'वर्चस्ववादात' शहरवासीयांची कोंडी!
गेल्या काही दिवसांपासून महापालिकेत बजेट मंजुरीच्या प्रक्रियेवरून सत्ताधारी भाजपमध्ये दोन गट पडल्याचे स्पष्ट चित्र आहे. बजेटमध्ये कोणत्या विकासकामांना प्राधान्य द्यावे, यापेक्षा 'कोणाचे वर्चस्व राहील' यावरून भाजपमध्ये जोरदार रस्सीखेच सुरू आहे. याचा थेट फटका सांगलीकरांना बसत असून, महत्त्वाची कामे कागदावरच अडकून पडली आहेत.
मंगेश चव्हाण यांचा 'घणाघात'
विकासाचा नरबळी: "भाजपच्या अंतर्गत वादात सांगलीच्या जनतेच्या हक्काचा पैसा आणि विकास या दोन्ही गोष्टींचा बळी दिला जात आहे. हे शहर कुणाच्या बापाचे नाही, हे सत्ताधाऱ्यांनी लक्षात ठेवावे."बजेट जाणीवपूर्वक रोखले: "बजेट मंजुरीला जाणीवपूर्वक उशीर केला जात आहे. पावसाळा तोंडावर असताना रस्ते आणि ड्रेनेजची कामे रखडणार आहेत. याला सर्वस्वी भाजपची गटबाजी जबाबदार आहे."सत्तेचा माज अन् प्रशासनावर दबाव: "सत्ताधाऱ्यांना जनतेच्या प्रश्नांशी काहीही देणेघेणे उरलेले नाही, त्यांना फक्त खुर्ची आणि आपापल्या गटाचे हित जपण्यात रस आहे. प्रशासनालाही त्यांनी वेठीस धरले आहे.""सत्ताधारी पक्षातील गटबाजी आता चव्हाट्यावर आली आहे. त्यांचे आपापसात जमत नाही, म्हणून शहराच्या बजेटला वेठीस धरणे हा सांगलीकरांचा अपमान आहे. जर तातडीने यावर तोडगा निघाला नाही, तर आम्ही रस्त्यावर उतरून भाजपच्या या भ्रष्ट आणि विस्कळीत कारभाराविरोधात तीव्र आंदोलन करू!"
जनता बेहाल, सत्ताधारी मालामाल?
सांगलीतील रस्त्यांची चाळण झाली आहे, पाणीपुरवठा वारंवार विस्कळीत होत आहे आणि दुसरीकडे बजेट मंजुरीवरून केवळ राजकीय कुरघोडी सुरू आहे. मंगेश चव्हाण यांच्या या थेट हल्ल्यामुळे सांगलीतील भाजपच्या गोटात मोठी खळबळ उडाली असून, आता सत्ताधारी गट या आरोपांवर काय स्पष्टीकरण देणार, याकडे संपूर्ण जिल्ह्याचे लक्ष लागले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
