लंडनमध्ये भारताचे सरन्यायाधीश सूर्य कांत यांच्या कार्यक्रमात गदारोळ; 'झुरळ' वक्तव्यावरून उपस्थितांनी घेतले धारेवर, भारतीय दूतावासाकडून तीव्र निषेध
लंडन :- भारताचे सरन्यायाधीश (CJI) सूर्य कांत सध्या युनायटेड किंगडमच्या (UK) सहा दिवसांच्या अधिकृत दौऱ्यावर आहेत. मात्र, या दौऱ्यादरम्यान लंडनमध्ये एका कार्यक्रमात मोठा गोंधळ उडाल्याची धक्कादायक घटना समोर आली आहे. बर्कबेक, युनिव्हर्सिटी ऑफ लंडन येथे आयोजित करण्यात आलेल्या एका व्याख्यानादरम्यान हा प्रकार घडला. 'इंडिया टुडे'ने या संदर्भातील वृत्त दिले आहे.
'त्या' वक्तव्यावरून विचारले जाब
युनिव्हर्सिटीत आयोजित या व्याख्यानादरम्यान प्रश्नोत्तराच्या तासात काही उपस्थितांनी आक्रमक पवित्रा घेतला. भारतात विरोधकांचे आवाज दाबले जात असल्याचा आरोप करत, उपस्थितांनी सरन्यायाधीशांना भारतातील 'विरोधी मतप्रवाह' आणि अभिव्यक्ती स्वातंत्र्याबाबत प्रश्न विचारले.
यात प्रामुख्याने, सरन्यायाधीशांनी काही काळापूर्वी तरुणांना उद्देशून केलेल्या 'झुरळ' वक्तव्याचा मुद्दा उपस्थितांनी लावून धरला. या विधानावरून वातावरण तापले आणि कार्यक्रमस्थळी प्रचंड गदारोळ झाला. या घटनेचे व्हिडिओ सध्या सोशल मीडियावर वेगाने व्हायरल होत आहेत.
भारतीय दूतावासाकडून तीव्र निषेध
या सर्व प्रकारानंतर युनायटेड किंगडममधील भारतीय दूतावासाने अत्यंत आक्रमक भूमिका घेतली आहे. दूतावासाने अधिकृत निवेदन जारी करत या घटनेचा तीव्र शब्दांत निषेध केला आहे. "भारताच्या सर्वोच्च न्यायालयाच्या मुख्य न्यायमूर्तींच्या कार्यक्रमात झालेला गोंधळ आणि काही व्यक्तींचे वर्तन अत्यंत अशोभनीय होते. वैचारिक मतभेद व्यक्त करण्याची एक सभ्य पद्धत असते, परंतु अशा प्रकारे आंतरराष्ट्रीय मंचावर गोंधळ घालणे निषेधार्ह आहे," असे भारतीय दूतावासाने म्हटले आहे.
सोशल मीडियावर चर्चांना उधाण
सरन्यायाधीशांच्या या दौऱ्याकडे कायदेशीर आणि राजनैतिक दृष्टिकोनातून अत्यंत महत्त्वाचा दौरा म्हणून पाहिले जात होते. मात्र, या गोंधळामुळे या दौऱ्याला गालबोट लागले आहे. सोशल मीडियावर व्हायरल होत असलेल्या व्हिडिओंवर आता संमिश्र प्रतिक्रिया उमटत असून, परदेशातील भारतीय समुदायामध्येही या घटनेबाबत उलटसुलट चर्चा सुरू आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
