मोठा राजकीय भूकंप! शहजाद पूनावालांचा भाजपला 'जय महाराष्ट्र'? X वरील बायो बदलल्याने सोशल मीडियावर खळबळ!
भारतीय जनता पक्षाचे राष्ट्रीय प्रवक्ते शहजाद पूनावाला यांनी सोशल मीडिया प्लॅटफॉर्म ‘X’ (पूर्वीचे ट्विटर) वरील आपला बायो बदलल्याने राजकीय वर्तुळात त्यांच्या राजीनाम्याची आणि सक्रिय राजकारणातून बाहेर पडण्याची जोरदार चर्चा सुरू झाली आहे. त्यांनी पक्षाच्या सर्व पदांचा राजीनामा दिल्याचा दावा केला जात असला, तरी अद्याप यासंदर्भात भाजपाकडून किंवा खुद्द पूनावाला यांच्याकडून कोणतेही अधिकृत वक्तव्य आलेले नाही.
‘X’ वरील बायो बदलला
गुरुवारी पूनावाला यांनी आपल्या ‘X’ प्रोफाईलमधून भाजपाच्या कोणत्याही पदाचा उल्लेख हटवला आहे. नव्या बायोमध्ये त्यांनी स्वतःचा उल्लेख ‘पंतप्रधान नरेंद्र मोदी यांचा आजीवन अनुयायी’ असा केला आहे. त्यांनी प्रोफाईलमधील हा बदल नेमक्या कोणत्या कारणाने केला, याबाबत अद्याप स्पष्टीकरण दिलेले नाही.
२०१७ मध्ये काँग्रेस सोडून भाजपमध्ये प्रवेश
२०१७ मध्ये काँग्रेस अध्यक्षपदाच्या निवडणूक प्रक्रियेवरून मतभेद झाल्यानंतर शहजाद पूनावाला यांनी काँग्रेसला सोडचिठ्ठी दिली होती. त्यानंतर त्यांनी भारतीय जनता पक्षात प्रवेश केला. अभ्यासू वृत्ती आणि आक्रमक वक्तृत्वशैलीमुळे भाजपमध्ये त्यांना राष्ट्रीय प्रवक्तेपदाची मोठी जबाबदारी देण्यात आली होती. न्यूज चॅनेल्सवरील चर्चासत्रे आणि सोशल मीडियावर ते भाजप व पंतप्रधान मोदी यांची बाजू अत्यंत ठामपणे मांडताना दिसायचे.
सोशल मीडिया पोस्टवरून राजकीय संन्यासाचे संकेत
गेल्या काही दिवसांतील त्यांच्या सोशल मीडिया पोस्टवरून ते सक्रिय राजकारणातून बाहेर पडण्याचे संकेत देत असल्याचे दिसून येते. त्यांनी आपल्या जुन्या मुलाखतींच्या काही व्हिडिओ क्लिप्स कोणत्याही कॅप्शनशिवाय शेअर केल्या होत्या, ज्यामध्ये ते राजकारण सोडण्याबद्दल बोलताना दिसत आहेत. त्यातील एका व्हिडिओमध्ये ते म्हणतात, “आपण राजकीय ध्येय आणि निवडणुकीतील ध्येय यांची सरमिसळ करतो, हीच खरी अडचण आहे. निवडणुकीतील ध्येय साध्य झाल्यावरच मी समाजासाठी योगदान देऊ शकेन, असे मानणे चुकीचे आहे. मी खासदार झालो नाही, तर समाजात किंवा राजकारणात माझे काहीच योगदान नाही असा त्याचा अर्थ होतो का? मी या पदांच्या मागे पळण्यातच माझी सगळी ऊर्जा खर्च करावी का? प्रत्येकाने आपण देशासाठी काय योगदान देऊ शकतो याचा विचार केला पाहिजे. काही लोक लोकप्रतिनिधी होऊन योगदान देतात, तर काही जण या व्यवस्थेच्या बाहेर राहून प्रयत्न करतात. याचा अर्थ ते अराजकीय आहेत असा होत नाही.”
२०२४ ची निवडणूकच शेवटची?
दुसऱ्या एका क्लिपमध्ये पूनावाला यांनी स्पष्ट केले होते की, त्यांनी २०२४ ची लोकसभा निवडणूक ही आपली शेवटची निवडणूक मानली होती. “२०२४ मध्येच मी सक्रिय राजकारणातून बाहेर पडण्याचा निर्णय घेतला होता. परंतु पश्चिम बंगाल, दिल्ली, हरियाणा, बिहार आणि महाराष्ट्र या महत्त्वाच्या निवडणुकांमुळे मी थांबलो होतो. आता सक्रिय राजकारणातून पुढे जाण्याची (बाहेर पडण्याची) हीच योग्य वेळ आहे,” असे ते यात स्पष्टपणे सांगताना दिसतात.ही क्लिप त्यांनी सर्वप्रथम २८ जून रोजी “मी या निर्णयासाठी आधीच २ वर्षे उशीर केला आहे…” अशा कॅप्शनसह पोस्ट केली होती. गुरुवारी हीच क्लिप त्यांनी पुन्हा शेअर केल्यामुळे त्यांच्या राजीनाम्याच्या चर्चांना उधाण आले आहे. दरम्यान, बायो अपडेट आणि सोशल मीडिया पोस्टमुळे तर्कवितर्कांना उधाण आले असले, तरी पूनावाला यांच्या अधिकृत भूमिकेकडे आणि भाजपच्या औपचारिक प्रतिक्रियेकडे सर्वांचे लक्ष लागले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
