मोठी खळबळ! राज्याच्या मंत्र्याच्या मुलाच्या कंपनीला ६ कोटींचा गंडा घालण्याचा प्रयत्न; दोघे गजाआड

मोठी खळबळ! राज्याच्या मंत्र्याच्या मुलाच्या कंपनीला ६ कोटींचा गंडा घालण्याचा प्रयत्न; दोघे गजाआड

पणजी : गोव्यातील एका मोठ्या रिअल इस्टेट प्रकल्पाशी संबंधित खंडणीच्या प्रकरणात मुंबई पोलिसांच्या 'अँटी-एक्सटॉर्शन सेल'ने दोघांना अटक केली आहे. आरोपींनी 'द हाऊस ऑफ अभिनंदन लोढा' या कंपनीच्या अधिकाऱ्यांना धमकावून 6 कोटी रुपयांची मागणी केली होती. 

त्यानंतर त्यांच्याकडून सुमारे 41 लाख रुपये उकळले होते. मात्र आता पोलिसांनी सिद्धेश जना तारी आणि प्रीतेश साळगावकर या दोघांना खंडणी मागितल्या प्रकरणी अटक केली आहे. ते दोघेही उत्तर गोव्यातील बिचोली (डिचोली) तालुक्यातील कारापूर गावचे रहिवासी आहेत. याच भागात कंपनीचा 'वन गोवा'  हा प्रसिद्ध टाउनशिप प्रकल्प विकसित केला जात आहे. याप्रकरणी कंपनीचे संपर्क अधिकारी (लायझन ऑफिसर) भूषण पाटील यांनी तक्रार दाखल केली होती.

पोलिसांच्या तपासात असे निष्पन्न झाले की, या दोन आरोपींनी एप्रिल महिन्यात प्रकल्पाच्या ठिकाणी बळजबरीने प्रवेश केला आणि तेथील अधिकाऱ्यांना धमकावण्यास सुरुवात केली. हा प्रकल्प स्थानिक हिताच्या विरोधात असल्याचा दावा करत त्या दोघआंनी काम त्वरित थांबवण्याची मागणी केली होती. मात्र जेव्हा अधिकाऱ्यांनी त्यांना सांगितले की, त्यांच्याकडे सर्व आवश्यक सरकारी परवानग्या आहेत, तेव्हा आरोपींनी 'आरटीआय' (RTI) अर्ज दाखल करण्याची आणि प्रकल्पाला पाठिंबा देणाऱ्या ग्रामपंचायत सदस्यांना लक्ष्य करण्याची धमकी दिली. तसेच, विविध ठिकाणी या प्रकल्पाविरुद्ध झालेल्या आंदोलनांचे श्रेयही त्यांनी स्वतःकडे घेतले.

कंपनीच्या प्रतिनिधींनी त्यांना कायदेशीर मार्गाचा अवलंब करण्याचा सल्ला दिला असता, आरोपींनी उद्धटपणे उत्तर दिले की, आम्हाला काय योग्य आणि काय अयोग्य हे शिकवू नका. नेमकी काय मागणी आहे असे विचारल्यावर, त्यांनी प्रत्येकी 3 कोटी रुपये म्हणजेच एकूण 6 कोटी रुपयांची मागणी केली. वारंवार मिळणाऱ्या धमक्यांना कंटाळून कंपनीने अखेर मे महिन्यात सिद्धेश तारीला 34 लाख रुपये आणि प्रीतेश साळगावकरला 7 लाख रुपये दिले. मात्र, खंडणी दिल्यानंतरही त्या दोघांची हाव शमली नाही आणि त्यांनी आणखी पैशांची मागणी सुरू केली. तसेच आंदोलकांची संख्या मोठी असून त्या सर्वांना पैसे द्यावे लागतील, असा युक्तिवादही त्यांनी केला. मात्र कंपनीच्या मुंबई कार्यालयात आलेला एक धमकीचा फोन कॉल रेकॉर्ड केल्यावर हे प्रकरण उघडकीस आले.

पोलिसांनी रेकॉर्डिंगच्या आधारे, भारतीय न्याय संहिता (BNS), 2023 च्या कलम 308 (खंडणी), 351 (गुन्हेगारी स्वरूपाची धमकी) आणि 61 (गुन्हेगारी कट) अन्वये गुन्हा दाखल केला. त्यानंतर, मुंबई पोलिसांच्या खंडणी-विरोधी पथकाने (Anti-Extortion Cell) कारापूर येथे सापळा रचून त्या दोन आरोपींचा शोध घेतला आणि रविवारी (30 ऑगस्ट) त्यांना अटक केली. 'वन गोवा' (One Goa) प्रकल्पाविरुद्ध काही ग्रामस्थ आणि कार्यकर्त्यांनी केलेल्या निदर्शनांनंतर ही कारवाई करण्यात आली आहे. विशेष म्हणजे 'द हाऊस ऑफ अभिनंदन लोढा' (HoABL) या कंपनीचे प्रमुख अभिनंदन लोढा हे महाराष्ट्र सरकारमधील मंत्री मंगल प्रभात लोढा यांचे सुपुत्र आहेत.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.