रुग्णालयातील लिफ्टमध्ये अडकल्याने रुग्णाचा मृत्यू; कुटुंबीयांकडून कारवाईची मागणी
तांत्रिक बिघाडामुळे रुग्णालयातील लिफ्ट बंद पडली. लिफ्टमध्ये अडकल्याने रुग्णाचा मृत्यू झाला. या घटनेनंतर संतप्त कुटुबीयांनी रुग्णालयाबाहेर गोंधळ घातला. रुग्णालय व्यवस्थापनावर घोर निष्काळजीपणाचा आरोप केला आहे.
परिस्थिती नियंत्रणात आणण्यासाठी पोलिसांना मध्यस्थी करावी लागली. मध्य प्रदेशातील रेवा जिल्ह्यातील नॅशनल रुग्णालयात ही घटना घडली.
टीव्ही 9 भारतवर्षने दिलेल्या वृत्तानुसार, मैहर जिल्ह्यातील लालपूर गावातील रहिवासी असलेले 52 वर्षीय सुरेश सेन काही दिवसांपूर्वी झाडावरून पडून जखमी झाले होते आणि त्यांचा खांदा मोडला होता. चांगल्या उपचारांसाठी कुटुंबीयांनी त्यांना शनिवारी संध्याकाळी रेवा येथील सिरमौर स्क्वेअरमधील नॅशनल हॉस्पिटलमध्ये दाखल केले होते.
शनिवारी रात्री सुरेश सेन यांना लिफ्टने स्ट्रेचरवरून उपचारासाठी वरच्या मजल्यावर नेण्यात येत होते. यादरम्यान लिफ्ट अचानक बिघडली आणि खाली कोसळली. मयताच्या मुलाच्या माहितीनुसार, ते लिफ्टजवळ पोहोचले तेव्हा वडिलांचे अर्धे शरीर लिफ्टच्या खालच्या भागात अडकले होते आणि तो कर्मचारी तिथे नव्हता.
कुटुंबीयांनी दिलेल्या वृत्तानुसार, अपघाताच्या अवघ्या 20 मिनिटांपूर्वी एक तरुणी त्याच लिफ्टमध्ये अडकली होती. असे असूनही रुग्णालय प्रशासनाने कोणतीही खबरदारी घेतली नाही किंवा लिफ्ट थांबवली नाही. निष्काळजीपणामुळे मयत रुग्णाला त्याच सदोष लिफ्टमधून नेण्यात आले, ज्यामुळे त्या रुग्णाचा मृत्यू झाला.
घटनेची माहिती मिळताच समन पोलीस ठाण्याचे पोलीस आणि सीएसपी राजीव पाठक पोलीस दलासह घटनास्थळी दाखल झाले. त्यांनी कुटुंबीयांना शांत करण्याचा प्रयत्न केला. सध्या पोलिसांनी मृतदेह ताब्यात घेतला असून तो शवविच्छेदनासाठी पाठवला आहे. लिफ्टमधील तांत्रिक त्रुटी आणि रुग्णालय व्यवस्थापनाच्या भूमिकेची चौकशी केली जात आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
