मुंबई : केंद्रीय सामाजिक न्याय राज्यमंत्री रामदास आठवले यांनी रक्षाबंधनानिमित्त मुंबईतील कामाठीपुऱ्यात जाऊन तेथील महिलांसोबत रक्षाबंधन साजरे केले. यावेळी महिलांनी आठवले यांच्या हातावर राखी बांधली.
कामाठीपुऱ्यातील महिलांच्या समस्या जाणून घेत त्यांचे पुनर्वसन आणि त्यांना रोजगाराच्या संधी उपलब्ध करून देण्यासाठी प्रयत्न करण्याचा निर्धार आठवले यांनी व्यक्त केला.
"मी आज पहिल्यांदाच कामाठीपुऱ्यात आलो आहे. येथे राहणाऱ्या महिला परिस्थितीच्या रेट्यामुळे हे काम करत आहेत. महाराष्ट्रासह कर्नाटक, आंध्र प्रदेश, तेलंगणा आणि पश्चिम बंगाल या विविध राज्यांमधून महिला येथे येतात. उदरनिर्वाहासाठी त्यांना येथेच राहावे लागते. आज त्यांच्या हस्ते राखी बांधून घेण्याचा मला बहुमान मिळाला," असे आठवले यांनी सांगितले.
कामाठीपुऱ्यातील महिलांना अशा परिस्थितीत राहावे लागू नये, यासाठी त्यांना मुख्य प्रवाहात आणणे आवश्यक असल्याचेही त्यांनी नमूद केले. "या महिलांच्या समस्या सोडवण्यासाठी मी सर्वतोपरी प्रयत्न करेन. त्यांचे पुनर्वसन करून त्यांना रोजगाराच्या संधी उपलब्ध करून देणे अत्यंत आवश्यक आहे," असे आठवले म्हणाले.
रक्षाबंधनाच्या निमित्ताने कामाठीपुऱ्यातील महिलांशी संवाद साधत त्यांच्या अडचणी समजून घेण्याचा प्रयत्न केल्याचे आठवले यांनी सांगितले. महिलांना सन्मानाने आणि सुरक्षित वातावरणात जीवन जगता यावे, यासाठी पुनर्वसनाबरोबरच रोजगारनिर्मितीवर भर देण्याची गरज त्यांनी व्यक्त केली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
