वाढीव घरपट्टीविरोधात ४ ऑगस्टच्या 'सांगली बंद'ला शिक्षण संस्था संघाचा जाहीर पाठिंबा; मनपाच्या अवास्तव करवाढीला तीव्र विरोध
सांगली, मिरज आणि कुपवाड महानगरपालिकेने लादलेल्या अवास्तव व अन्यायकारक वाढीव घरपट्टीच्या निषेधार्थ 'वाढीव घरपट्टी आंदोलन कृती समिती'ने मंगळवार, दि. ४ ऑगस्ट २०२६ रोजी पुकारलेल्या 'सांगली बंद' आंदोलनाला सांगली जिल्हा शिक्षण संस्था संघाने आपला जाहीर व संपूर्ण पाठिंबा घोषित केला आहे. शिक्षण संस्थांच्या भूमिकेबाबत संघाचे अध्यक्ष श्री. रावसाहेब पाटील व सेक्रेटरी श्री. विनोद पाटोळे यांनी कृती समितीच्या अध्यक्षांना अधिकृत पाठिंब्याचे निवेदन सोपवले. याप्रसंगी सहकार्यवाह श्री. शिवपुत्र आरबोळे, सहकार्यवाह श्री. एस. के. होर्तीकर आणि संघटक श्री. वैभव गुरव यांची प्रमुख उपस्थिती होती.
"शिक्षण संस्था नफा कमावणाऱ्या व्यापारी संस्था नाहीत"
कृती समितीला दिलेल्या निवेदनात शिक्षण संस्था संघाने महानगरपालिकेच्या कारभारावर जोरदार ताशेरे ओढले आहेत. "शिक्षण संस्था या कोणत्याही प्रकारचा नफा कमावणाऱ्या व्यापारी संस्था नसून समाजहितासाठी कार्यरत असणाऱ्या धर्मादाय संस्था आहेत. असे असतानाही महापालिकेने त्यांच्यावर व्यापारी संस्थांप्रमाणे अवास्तव घरपट्टी लादणे अत्यंत चुकीचे व अयोग्य आहे," असे निवेदनात स्पष्ट करण्यात आले आहे.
विद्यार्थी व पालकांवर अप्रत्यक्ष भुर्दंड बसण्याची भीती
महानगरपालिकेने केलेल्या या अफाट करवाढीमुळे शिक्षण संस्थांच्या आर्थिक नियोजनाचे गणित पूर्णपणे कोलमडले आहे. संस्थांवरील हा वाढीव आर्थिक भार सरतेशेवटी अप्रत्यक्षपणे विद्यार्थी आणि पालकांवरच पडण्याची दाट शक्यता असून, यामुळे शैक्षणिक क्षेत्राचे मोठे नुकसान होईल, अशी भीतीही संघाने व्यक्त केली आहे.
प्रमुख मागण्या:
शिक्षण संस्थांचे धर्मादाय आणि सामाजिक स्वरूप विचारात घेऊन त्यांना घरपट्टीमधून संपूर्ण माफी देण्यात यावी. महापालिकेने लागू केलेली वाढीव घरपट्टी त्वरित व पूर्णपणे मागे घ्यावी. "वाढीव घरपट्टीविरोधातील हा लढा केवळ एका घटकापुरता मर्यादित नसून सर्वसामान्य नागरिक, व्यावसायिक, व्यापारी, उद्योग आणि शैक्षणिक क्षेत्राच्या अस्तित्वाचा व हिताचा आहे. त्यामुळेच सांगली जिल्हा शिक्षण संस्था संघ ४ ऑगस्टच्या बंदमध्ये पूर्ण ताकदीने सहभागी होत आहे."— श्री. रावसाहेब पाटील (अध्यक्ष, सांगली जिल्हा शिक्षण संस्था संघ)
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
