धर्मादाय रुग्णालयाची दडपशाही मोडून काढली! भारती हॉस्पिटलला धर्मादाय आयुक्तांचा मोठा दणका; गरीब रुग्णाकडून उकळलेले २ लाख परत करण्याचे आदेश
मिरज :-केसरी राशन कार्डधारक असणाऱ्या एका गरीब रुग्णावर मोफत उपचारांचा कायदेशीर हक्क असताना, उपचाराच्या नावाखाली २ लाखांहून अधिक रुपये बेकायदेशीरपणे वसूल करणाऱ्या मिरजेतील भारती हॉस्पिटलला साहाय्यक धर्मादाय आयुक्तांनी (सांगली विभाग) मोठा दणका दिला आहे. रुग्णाच्या हक्कांची पायमल्ली करणाऱ्या या हॉस्पिटलला अनधिकृतपणे आकारलेली रक्कम तात्काळ निश्चित करून ती तक्रारदाराला परत करण्याचे आणि त्याचा अनुपालन अहवाल सादर करण्याचे कडक आदेश धर्मादाय आयुक्तांनी दिले आहेत.
काय आहे नेमके प्रकरण?
तक्रारदार रेखा बाबू अच्युतून यांच्या आई सौ. मंगल बाबू अच्युतून यांना मधुमेहामुळे पायाला गंभीर दुखापत झाली होती. परिस्थिती अत्यंत बिकट झाल्याने त्यांना मिरजेतील भारती हॉस्पिटलमध्ये दाखल करण्यात आले. तेथे त्यांच्या पायाचा पंजा कापण्याची (Amputation) शस्त्रक्रिया करण्यात आली.
शासकीय नियमांनुसार आणि धर्मादाय रुग्णालय योजनेअंतर्गत 'केसरी राशन कार्ड' धारक असलेल्या आर्थिकदृष्ट्या दुर्बल रुग्णांना मोफत किंवा सवलतीच्या दरात वैद्यकीय उपचार मिळणे बंधनकारक आहे. मात्र, भारती हॉस्पिटल प्रशासनाने या नियमांकडे पूर्णपणे दुर्लक्ष करत मंगल अच्युतून यांच्या कुटुंबाकडून तब्बल दोन लाख रुपयांहून अधिकची रक्कम उकळली.
साहाय्यक धर्मादाय आयुक्तांचा रोखठोक निर्णय
आपल्या हक्कांवर गदा आल्याचे लक्षात येताच तक्रारदार रेखा अच्युतून यांनी उपचारांच्या सर्व देयकांसह (बिलांसह) साहाय्यक धर्मादाय आयुक्त, सांगली यांच्याकडे रीतसर तक्रार अर्ज दाखल केला. या अर्जाची गंभीर दखल घेत धर्मादाय आयुक्तांनी पुढील महत्त्वपूर्ण आदेश जारी केले:
रक्कम परताव्याचे आदेश: प्रचलित नियम व धर्मादाय रुग्णालय योजनेनुसार देय असलेली योग्य रक्कम निश्चित करून, बेकायदेशीरपणे आकारलेली उर्वरित सर्व रक्कम तक्रारदारास तात्काळ परत करावी.
अनुपालन अहवाल बंधनकारक: नियमानुसार कारवाई पूर्ण करून रुग्णाच्या कुटुंबाला परतावा दिला असल्याचे सर्व कागदपत्रांसह स्पष्ट करणारा अनुपालन अहवाल न्यायाधिकरणाकडे सादर करावा.
माहिती अधिकार कार्यकर्त्याचे सहकार्य व आरोग्य हक्क समितीचा इशारा
या संपूर्ण लढ्यात माहिती अधिकार व्याख्याते शाहीन शेख यांचे अनमोल मार्गदर्शन लाभल्याचे तक्रारदार कुटुंबाने नमूद केले.
या निर्णयावर प्रतिक्रिया देताना आरोग्य हक्क समितीचे संघटक प्रमोद माळी यांनी धर्मादाय रुग्णालयांना इशारा दिला:
"धर्मादाय रुग्णालयांच्या नावाखाली गरिबांची लूट करणाऱ्या आणि नियमांची पायमल्ली करणाऱ्या व्यवस्थांना हा निर्णय म्हणजे चपराक आहे. कायद्यानुसार गरिबांना मिळणाऱ्या सवलती नाकारणाऱ्या एकाही रुग्णालयाला सोडले जाणार नाही. बेकायदेशीरपणे वसूल केलेली संपूर्ण रक्कम परत मिळेपर्यंत आणि दोषींवर कारवाई होईपर्यंत हा लढा असाच सुरू राहील."
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
