सांगली-मिरजेत गणेशोत्सवाला सुरांची पसंती; चंद्रकांतदादांच्या संकल्पनेतून ‘स्वरगंध’ मैफिलींना उदंड प्रतिसाद!

सांगली-मिरजेत गणेशोत्सवाला सुरांची पसंती; चंद्रकांतदादांच्या संकल्पनेतून ‘स्वरगंध’ मैफिलींना उदंड प्रतिसाद!

सांगली-मिरज-कुपवाड : ढोल-ताशांचा निनाद, आरतीचे भक्तिमय स्वर, गणरायाच्या जयघोषाने भारलेले वातावरण आणि त्यात मिसळलेली सुरांची मैफल... सांगली-मिरज परिसरातील गणेशोत्सवाला यंदा भक्तीबरोबरच संगीत आणि कलेची अनोखी रंगत लाभत आहे.

राज्याचे उच्च व तंत्रशिक्षण, संसदीय कार्यमंत्री आणि सांगली जिल्ह्याचे पालकमंत्री ना. चंद्रकांतदादा पाटील यांच्या संकल्पनेतून आणि पालकमंत्री महोदयांचे विशेष कार्य अधिकारी बाळासाहेब यादव यांच्या मार्गदर्शनाखाली विविध गणेशोत्सव मंडळांमध्ये ‘स्वरगंध’ या हिंदी-मराठी गीतांच्या मैफिलींचे आयोजन करण्यात आले आहे. गणरायाच्या चरणी संगीतकलेची सेवा अर्पण करण्याची ही आगळीवेगळी संकल्पना असून, नागरिकांकडून या उपक्रमाला उत्स्फूर्त प्रतिसाद मिळत आहे. गणेशोत्सव हा केवळ धार्मिक उत्सव न राहता समाजातील कला, संस्कृती आणि आपलेपणाचे दर्शन घडविणारा उत्सव व्हावा, नागरिकांना आपल्या परिसरातच दर्जेदार संगीताचा आनंद घेता यावा आणि कलाकारांच्या कलेला रसिकांपर्यंत पोहोचण्यासाठी व्यासपीठ मिळावे, या विचारातून हा उपक्रम साकारला आहे.

सुरांची मैफल पुढेही रंगणार

१५ सप्टेंबरपासून सुरू झालेल्या या उपक्रमांत सांगली आणि मिरज परिसरातील विविध गणेशोत्सव मंडळांमध्ये आतापर्यंत सहा संगीत कार्यक्रम उत्साहात पार पडले आहेत. पुढील चार दिवसांतही मिरज शहरातील विविध गणेश मंडळांच्या परिसरात ‘स्वरगंध’च्या मैफिली रंगणार असून, गणेशोत्सवाच्या वातावरणात नागरिकांना सुरेल सांस्कृतिक मेजवानीचा आनंद घेता येणार आहे. अशा प्रकारे गणेशोत्सवाच्या कालावधीत एकूण दहा गणेश मंडळांमध्ये या सांस्कृतिक कार्यक्रमांचे आयोजन करण्यात आले आहे.

आगामी कार्यक्रम

२१ सप्टेंबर — त्रिमूर्ती मंडळ, गणेश तलाव, मिरज

२२ सप्टेंबर — सिद्धिविनायक गणेशोत्सव मंडळ, नदीवेस, पाटील गल्ली, मिरज

२३ सप्टेंबर — मंगळवार पेठचा राजा, मंगळवार पेठ, मिरज

२४ सप्टेंबर — तोडकर मळा मित्र मंडळ, जुना हरिपूर रस्ता, मिरज

सुरेल कलाकारांची साथ

या कार्यक्रमांना अनुभवी कलाकारांची सुरेल साथ लाभत आहे. संगीत संयोजन व ऑक्टो पॅडवर किरण ठाणेदार, कीबोर्डवर अविनाश इनामदार, गिटारवर राकेश मिस्त्री, ढोलक-ढोलकीवर राम चौगुले, ढोलक-तबल्यावर केदार आणि ऑटो पॅडवर विनोद सावंत साथ देत आहेत. गायनाची जबाबदारी अमोल मोहिते, संदीप वाडेकर, सौ. विना चौगुले आणि अनुश्री सांभाळत आहेत. कार्यक्रमाचे निवेदन के. अजय करीत असून, ध्वनिव्यवस्था वेद राजू सुपेकर यांची आहे.

संगीताच्या सुरांत खुलली उत्सवाची रंगत

सांस्कृतिक कार्यक्रमांमुळे गणेश मंडळांच्या परिसरात नागरिकांची उपस्थिती वाढत असून, संगीताच्या सुरांमध्ये गणेशोत्सवाचा आनंद अनुभवता येत आहे. कुटुंबीयांसह कार्यक्रमाचा आनंद घेणाऱ्या नागरिकांकडून या उपक्रमाचे स्वागत होत आहे.

“गणेशोत्सवात धार्मिक कार्यक्रमांसोबत संगीताची अशी मैफल अनुभवायला मिळाल्याने उत्सवाची रंगत आणखी वाढली. कुटुंबासह एकत्र बसून प्रत्यक्ष गाणी ऐकण्याचा आनंद मिळत आहे,” अशी भावना नागरिकांकडून व्यक्त होत आहे.

ज्येष्ठ नागरिकांसाठी जुन्या गीतांच्या आठवणींना उजाळा देणारे क्षण, तर तरुणाईसाठी संगीताचा आनंद आणि कुटुंबांसाठी एकत्र वेळ घालवण्याची संधी, अशा विविध अंगांनी या कार्यक्रमांना प्रतिसाद मिळत आहे.

भक्तीबरोबर संस्कृतीचा उत्सव

गणेशोत्सवाच्या निमित्ताने प्रत्येक मंडळ आपल्या परीने विविध उपक्रम राबवत असते. त्यासोबतच या उपक्रमातून भक्तीच्या वातावरणाला संगीत आणि सांस्कृतिक कार्यक्रमांची साथ देत नागरिकांना एकत्र आणण्याचा प्रयत्न करण्यात आला आहे. गणेश मंडळांच्या परिसरातच कार्यक्रम होत असल्याने नागरिकांना सहज सहभागी होता येत आहे.

या उपक्रमाचा आणखी एक महत्त्वाचा पैलू म्हणजे कलाकारांना आपल्या कलेचे सादरीकरण करण्यासाठी व्यासपीठ आणि नागरिकांना आपल्या परिसरातच सांस्कृतिक कार्यक्रमाचा आनंद मिळत आहे. गायन, वादन आणि निवेदनाच्या माध्यमातून सादर होणाऱ्या या कार्यक्रमांमुळे गणेशोत्सवातील सांस्कृतिक वातावरण अधिक समृद्ध होत आहे.

चंद्रकांतदादांच्या संकल्पनेला सांस्कृतिक विस्तार

कला आणि संस्कृतीला प्रोत्साहन देत नागरिकांना उत्सवाच्या माध्यमातून दर्जेदार सांस्कृतिक अनुभव मिळावा, या विचारातून चंद्रकांतदादा पाटील यांनी हा उपक्रम संकल्पित केला आहे. कोथरूड मतदारसंघातही गणेशोत्सवाच्या निमित्ताने सांस्कृतिक उपक्रमांना प्रोत्साहन देण्यात आले आहे. त्याच धर्तीवर सांगली-मिरज परिसरातही गणेशोत्सवाच्या माध्यमातून कलाकार आणि रसिक यांना एकत्र आणण्याचा प्रयत्न होत आहे.

राज्याचे उच्च व तंत्रशिक्षण, संसदीय कार्यमंत्री आणि सांगली जिल्ह्याचे पालकमंत्री म्हणून विविध जबाबदाऱ्या सांभाळताना कला, संस्कृती आणि सामाजिक उपक्रमांना प्रोत्साहन देण्याचा हा प्रयत्न गणेशोत्सवाच्या निमित्ताने पुढे आला आहे.

सांस्कृतिक उपक्रमांतून सामाजिक बांधिलकीचा नवा अध्याय

आरोग्य शिबिरे, मोफत जनसुविधा शिबिरे, शैक्षणिक साहित्य वाटप, दिव्यांग बांधवांना कृत्रिम हात-पाय मोफत बसवणे आदी उपक्रमांसोबत आता गणेशोत्सवाच्या निमित्ताने सुरू झालेला हा नवा उपक्रम सामाजिक बांधिलकीच्या उपक्रमांना सांस्कृतिक आयाम देणारा ठरत आहे. भविष्यातही सांस्कृतिक उपक्रमांसोबत सामाजिक आणि सेवा कार्याला प्रोत्साहन देणाऱ्या विविध उपक्रमांना अधिक व्यापक स्वरूप देण्याचा चंद्रकांतदादांचा मानस आहे.

उत्सवांच्या माध्यमातून नागरिकांशी संवाद साधत कला-संस्कृतीला व्यासपीठ देणे, कलाकारांना प्रोत्साहन देणे आणि सामाजिक बांधिलकीच्या उपक्रमांना बळ देणे, या व्यापक विचाराला अशा कार्यक्रमांतून चालना मिळत आहे. त्यामुळे गणेशोत्सव हा केवळ उत्सव न राहता संस्कृती, सामाजिक सहभाग आणि सेवाभाव यांचा संगम ठरत आहे.

गणरायाच्या चरणी सुरांची सेवा...

आतापर्यंत सहा कार्यक्रम उत्साहात पार पडले असून, उर्वरित चार कार्यक्रमांकडे नागरिकांचे लक्ष लागले आहे. अनंत चतुर्दशीच्या आदल्या दिवसापर्यंत  गणेशोत्सवाच्या वातावरणात या सुरेल मैफिली सुरू राहणार आहेत.

गणरायाच्या चरणी श्रद्धेची फुले अर्पण होत असतानाच सुरांची वंदनाही अर्पण होत आहे. भक्ती, संगीत आणि कलेच्या या सुंदर संगमामुळे सांगली-मिरजमधील गणेशोत्सवाला यंदा एक वेगळीच सांस्कृतिक ओळख लाभली आहे. नागरिकांच्या चेहऱ्यावरचा आनंद, कलाकारांना मिळणारी रसिकांची दाद आणि गणेशोत्सवाच्या वातावरणात घुमणारे सुरेल स्वर हीच या उपक्रमाची खरी पावती ठरत आहे.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.