मिरजेत मध्यरात्री टोळक्याचा हैदोस! हातांत हॉकी स्टिक अन् लोखंडी रॉड घेऊन वाहनांची तोडफोड; ५ गाड्यांच्या काचा फोडल्या, थरार CCTV मध्ये कैद
मिरज :- मिरज शहरातील झानियाबाबा दर्गा परिसरात मध्यरात्रीच्या सुमारास एका टोळक्याने हातात हॉकी स्टिक आणि लोखंडी रॉड घेऊन तुफान राडा घालत प्रचंड दहशत माजवली. ५ ते ६ जणांच्या या टोळक्याने रस्त्यावर उभ्या असलेल्या गाड्यांवर हल्ला चढवत अक्षरशः हैदोस घातला. या तोडफोडीत पाच ते सहा वाहनांच्या काचा फोडून मोठे नुकसान करण्यात आले आहे. हा सर्व थरारक प्रकार जवळच असलेल्या सीसीटीव्ही (CCTV) कॅमेऱ्यात कैद झाला आहे.
वाहनांचे मोठे नुकसान
मध्यरात्रीच्या शांततेचा फायदा घेत आलेल्या या टोळक्याने रस्त्याकाठी पार्क केलेल्या वाहनांना लक्ष्य केले. यामध्ये:इम्रान बारगीर यांचा एक ट्रकफारुक जमादार यांचा एक ट्रकसाद्दम मेस्त्री यांच्याकडे आलेला एक मालवाहतूक टेम्पोएक टोयोटा (Toyota) चारचाकी कारया सर्व वाहनांवर हॉकी स्टिक आणि लोखंडी रॉडने सपासप वार करून त्यांच्या काचा फोडण्यात आल्या. अचानक झालेल्या या हल्ल्यामुळे परिसरात नागरिकांमध्ये भीतीचे वातावरण पसरले आहे.
दोन गटांतील वादातून प्रकार घडल्याचा संशय
घटनेची माहिती मिळताच मिरज पोलीस तातडीने घटनास्थळी दाखल झाले असून त्यांनी परिसराची पाहणी केली. प्राथमिक माहितीनुसार, दोन गटांत आधी झालेल्या वादाच्या रागातूनच हा प्रकार घडल्याचा संशय व्यक्त केला जात आहे. वाहनांची नासधूस केल्यानंतर हल्लेखोर अंधाराचा फायदा घेऊन पसार झाले.
आरोपींना पकडण्याचे पोलिसांसमोर आव्हान
वाहनांचे प्रचंड नुकसान झाल्याने संतप्त झालेल्या वाहनचालक आणि मालकांनी या गुंडांवर तातडीने कठोर कारवाई करण्याची मागणी केली आहे. सीसीटीव्ही फुटेजच्या आधारे पोलीस आरोपींची ओळख पटवण्याचे काम करत असून, या माथेफिरू टोळक्याच्या मुसक्या आवळण्याचे मोठे आव्हान आता मिरज पोलिसांसमोर उभे ठाकले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
