दिल्लीतून मोठी अपडेट: माजी उपराष्ट्रपती जगदीप धनखड भोवळ येऊन कोसळले

दिल्लीतून मोठी अपडेट: माजी उपराष्ट्रपती जगदीप धनखड भोवळ येऊन कोसळले

देशाचे माजी उपराष्ट्रपती जगदीप धनखड यांची प्रकृती आज सकाळी अचानक बिघडली. मॉर्निंग वॉकसाठी घराबाहेर पडले असताना ते अचानक बेशुद्ध होऊन जमिनीवर कोसळले. त्यानंतर त्यांना तातडीने दिल्लीतील एम्स रुग्णालयात दाखल करण्यात आले. 

७५ वर्षीय धनखड यांच्यावर कार्डिओ न्यूरो सेंटरमध्ये उपचार सुरू असून, कार्डिओलॉजी विभागाचे डॉक्टर त्यांच्या प्रकृतीवर लक्ष ठेवून आहेत. मात्र, त्यांच्या प्रकृतीबाबत अद्याप अधिकृत माहिती समोर आलेली नाही.

मॉर्निंग वॉकदरम्यान अचानक बेशुद्ध

जगदीप धनखड हे नेहमीप्रमाणे आज सकाळी मॉर्निंग वॉकसाठी घराबाहेर पडले होते. काही अंतर चालल्यानंतर त्यांना अचानक चक्कर आली आणि ते जमिनीवर कोसळले. यावेळी ते काही मिनिटे बेशुद्ध अवस्थेत होते. 

त्यांच्यासोबत असलेल्या सुरक्षा रक्षकांनी तातडीने मदत केली. त्यांना पीसीआर वाहनातून घरी आणण्यात आले. यानंतर इन्स्टिट्यूट ऑफ लिव्हर अँड बिलियरी सायन्सेस (ILBS) येथील वैद्यकीय पथक आणि एम्सचे डॉक्टर संदीप सेठ यांनी त्यांच्यावर प्राथमिक उपचार सुरू केले. त्यांना तातडीने वैद्यकीय मदत देण्यात आली.

प्रकृतीत सुधारणा न झाल्याने एम्समध्ये दाखल

प्राथमिक उपचारांनंतरही धनखड यांच्या प्रकृतीत अपेक्षित सुधारणा झाली नाही. त्यामुळे डॉक्टर आणि कुटुंबीयांची चिंता वाढली. त्यानंतर त्यांना तातडीने दिल्लीतील एम्स रुग्णालयात दाखल करण्यात आले. येथे त्यांना कार्डिओ न्यूरो सेंटरमध्ये भरती करण्यात आले असून, कार्डिओलॉजी विभागाच्या डॉक्टरांच्या देखरेखीखाली उपचार सुरू आहेत.

प्रकृतीबाबत अधिकृत माहिती नाही

जगदीप धनखड यांना नेमका कोणता त्रास झाला, ते कशामुळे बेशुद्ध पडले आणि सध्या त्यांची प्रकृती कशी आहे, याबाबत अद्याप स्पष्ट माहिती मिळालेली नाही. ते शुद्धीवर आले आहेत का आणि त्यांची प्रकृती धोक्याबाहेर आहे का, याबाबतही अधिकृत माहिती देण्यात आलेली नाही. उपचार करणाऱ्या डॉक्टरांकडून किंवा त्यांच्या कुटुंबीयांकडून कोणतेही अधिकृत निवेदन आलेले नाही.

दरम्यान, जगदीप धनखड यांनी ऑगस्ट २०२२ मध्ये देशाच्या १४ व्या उपराष्ट्रपतीपदाची जबाबदारी स्वीकारली होती. जुलै २०२५ पर्यंत त्यांनी या पदावर काम केले. त्यानंतर त्यांनी उपराष्ट्रपतीपदाचा राजीनामा दिला होता. तेव्हापासून ते सार्वजनिक कार्यक्रमांमध्ये फारसे दिसले नव्हते.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.